फेसबुक आणि जातीयवाद

     फेसबुकवर अनेक समूह आहेत. यापैकी बहुतांश समूहातून चक्कर मारल्यास एक धक्कादायक चित्र समोर येते. बहुतांश समूहात जातीभेद अगदी पराकोटीला पोहचलेला दिसून येतो. एकमेकांच्या जातीपातीवर टीका करूनच हि मंडळी थांबत नाहीत. आपण एका सोशल कम्युनिटी साईट वर आहोत याचे कोणतेही भान न ठेवता अर्वाच्च शिवीगाळ केली जाते. एखाद्याने एका विशिष्ट जातीवर टिपण्णी केली कि त्या जातीचे इतर सदस्य भावनाप्रधान होऊन त्या वादात ओढले जातात आणि तेही आपल्या जातभाईची सारासार विचार न करता बाजू घेऊन समोरच्या व्यक्तीला शिवीगाळ करू लागतात. खूप दिवसांपासून अनेक समूहांत हे चित्र वारंवार पाहत आहे. अशा गोष्टी पहिल्या कि खूप निराश वाटायला लागत. समाज कुठे भरकटत आहे ? अर्थात फेसबुक म्हणजे काही समाज नव्हे. किंवा ते समाजाचे एक प्रातिनिधिक रूपही म्हणता येणार नाही. फेसबुक वापरणारे बहुधा कॉलेज ला जाणारे युवक- युवती आणि ज्यांना सोशल सर्फिंग ची आवड आहे असे लोक असतात. आता यातील अनेक जन उच्च शिक्षित असतात. अडाणी किंवा अशिक्षित माणसाने फेसबुक वापरण्याचा प्रश्नच येत नाही. या दृष्टीने पाहीले तर फेसबुक हा आजच्या युवा पिढीचा आणि बुद्धीजीवी समाजाचा आरसा म्हटल तर फारस वावग ठरणार नाही.

        

          आता अशा बुद्धीजीवी लोकांमध्ये इतक्या हिडीस प्रकारे हे जातीयवादाचे बीज या समूहांच्या माध्यमातून रोवले जात आहे हे चिंताजनक आहे. अशा समूहामध्ये वावरणारा जातीभेद विरोधी व्यक्तीही अशा वातावरणात राहून काही काळाने जातीयवादी होण्याची शक्यता दाट ......किंबहुना अनेक जन असे जातीयवादी बनत आहेत या समूहांच्या माध्यमातून. बहुतांश ब्राम्हण आणि दलित हे दोन वर्ग यात टार्गेट होत आहेत. विशेषत: यात ठळकपणे उठून दिसते ते एका संघटनेचे नाव ...संभाजी ब्रिगेड. अनेक खरे खोटे आयडी वापरणारे ब्रिगेडी कार्यकर्ते फेसबुकवर कार्यरत आहेत. किंबहुना यातील अनेकांना खास पगार देऊन या कामासाठी नेमले आहे कि काय अशी शंका यावी इतक्या सातत्यपूर्ण रीतीने हे लोक इथे जातीवाद पसरवना-या पोस्ट करत असतात. यांचे ठरलेले एकच काम. इतिहासाची पुरावाहीन मोडतोड आणि ब्राम्हणद्वेष. इतिहासकालीन ब्राम्हणांची पापे आता सुशिक्षित समाजापासून लपून राहिलेली नाहीत. तथापि काही धर्ममार्तंडांच्या पापांसाठी सर्वच ब्राम्हणांना दोषी धरणे कितपत सयुक्तिक आहे. आणि या मध्ययुगीन घटनांचे खापर सध्याच्या ब्राम्हण समाजावर फोडणे तर अतिशय निंदनीय आहे. सतत होणा-या या बोच-या प्रचारामुळे काही ब्राम्हण कृष्णाजी भास्कर सारख्या दुष्मनाचे समर्थन करताना दिसले तर यात दोष कोणाला द्यायचा ?

        

           या भीषण प्रचाराचे टार्गेट सावरकरांसारख्या पराकोटीच्या देशभक्त नेत्याला केले जाते तेव्हा विषाद वाटतो. टीका करावी पण ती कोणत्या हीन पातळीपर्यंत ? सावरकरांच्या सागरातील त्या सुप्रसिद्ध उडीमुळे त्यांचे नाव क्रांतिकारकांच्या इतिहासात अजरामर झाले ती उडी त्यांनी संडासाच्या खिडकीतून मारली होती म्हणून सावरकरांचे वर्णन संडासवीर केशरी पुठ्ठा असे केले जाते हि कुठली संस्कृती आहे ? हि कसली देशभक्ती आहे ? ही कसली इतिहासाची पुनरर्चना आहे ?

        

           या जातीभेदाने हिंदू धर्माचे प्राचीन काळापासून अपरिमित नुकसान केले आहे. सध्याच्या समाजात ज्या काही समस्या आहेत त्या सर्वांची मुळे या जातीभेदात आहेत असे माझे मत आहे. या परस्पर विद्वेषाने हिंदू समुदायात कधी म्हणावी अशी एकजूट होऊ शकली नाही. याचा फायदा परकीय आक्रमकांनी घेतला. सध्याची परिस्थिती पाहता या इतिहासाची पुनुरावृत्ती होऊ नये इतकीच हिंदू धर्माचा एक सच्चा पाईक म्हणून माफक अपेक्षा !!